BUTUAN CITY – Mi-ulbo sa kasuko si Pangulong Ferdinand ‘Bongbong’ Marcos Jr human niya nakita sa gihimong surprise inspection kaganina nga usa ka klarong ghost project ang unta, usa ka flood control project sa Barangay Piel, lungsod sa Baliuag, lalawigan sa Bulacan.
Base sa record sa Department of Public Works and Highways kon DPWH, ang reinforced concrete riverwall project sa Purok 4, ubos sa pagtrabaho sa Syms Construction Trading nga gipunduhan og ₱55,730,911.60.
Nakalatid sa report nga siento-porsiento na kining natapos as of June ning tuiga apan dihang gisusi sa pangulo, human nadawat og reklamo, wala’y nakitang proyekto kondiin bisan semento, hollow blocks, ug mga ekwepo, wala sa mismong project site.
Misaad ang pangulo nga mag-atubang og patong-patong nga kaso ang mga contractors sama sa economic sabotage tungod sa kadako sa proyektong ilang gibinu-angan apil na ang falsification of public documents.
Apil usab sa kasuhan ang Bulacan 1st District Engineering Office human nakalatid sa ilang completion report nga siento-porsiento nang nakompleto ang maong proyekto niadto pang June ning tuiga.
