BUTUAN CITY – Gi-angkon sa National Intelligence Coordinating Agency kon NICA nga pildi ang gobyerno sa propaganda sa New People’s Army kon NPA.
Kini ang gi-angkon ni Samantha Son, focal person sa NICA atol sa gipahigayong media forum sa Camp Col Rafael Rodriguez ning siyudad sa Butuan.
Gipasabot ni Son nga ang kapildihan sa gobyerno sa propaganda sa NPA tungod na usab sa kakulang sa information campaign aron ipasayud sa katawhan ang mga programa sa gobyerno alang sa ilang kaayuhan.
Tungod niini mas gipahugtan pa sa kagamhanan ang pagpatuman sa Executive Order 70 nga nakatutuk sa whole-of-the- nation approach alang sa pagkab-ot sa malahutayong kalinaw, pagmugna og national task force to end local communist armed conflict, ug pag-adaptar sa national peace framework. Nasayran nga sa tuig 2030 target nga matapos ang nasangpit nga programa.
Samtang gidayeg ug gi-uyunan ni Ka Sandara – tigpamaba sa Northeastern Mindanao Regional Committee kon NEMRC sa New People’s Army ang pag-angkon sa National Intelligence Coordinating Agency nga pildi sa ilang grupo ang propaganda sa kagamhanan.
Sa eksklusibong pakighinabi sa Bombo Radyo Butuan, gipadayag ni Ka Sandara nga nagtug-an lang sa tinuod si Son base na usab sa iyang na-obserbahan ilabina nga transparent sila sa mga panghitabo ilabina kung duna’y ilang mga ka-ubanang makalas sa engkwentro.
Usa matud pa sa nakapildi sa black propaganda sa tropa sa kagamhanan batuk sa walhong kalihukan mao ang dili pag-angkon sa ilang mga nahimong sayop taliwa nga daghang yanong katawhan ang nasayod sa tinuod nga mga nagakahitabo
