BUTUAN CITY – Gipailalom karun sa pagtoon sa Commission on Election kon Comelec- Central Office ang inisyatibang gipatuman sa Comelec-Agusan Del Norte, ang Bata Program.
Sigon ni Atty. April Joy Balano, Provincial Election Supervisor IV sa Comelec-agusan Del Norte nga anaa pa sa testing stage ang BATA Program kon Bumoto Ayon sa Tama o sa bisaya pa Botar Alayon sa Tarong og Angay.
Pasabot pa sa opisyal nga kini dili lang simple nga Voter’s Education kundi usa ka transformative program diin moadtu sila sa mga tunghaan aron mohimo og pag-edukar sa mga magtutungha sa Grade 12.
Gi-angkon sa opisyal nga kausa sa usa ka semana sila moadto sa susamang mga bata aron mopatuman sa maong programa dayung butyag nga dapat regular kini nga himoon og sustainable aron mahimong learning process.
Tinguha niini nga ma-develop matud pa ang voting literacy sa mga bata diin dili lang sila basta mobotar kundi masabtan kung nganung dunay election o ang responsibilidad niini sa pagbotar.
Ang kasamtangang henerasyon sa mga botante kinahanglan matud pang mobotar dili lang base sa popularidad o kaha incentives nga madawat kundi sa prinsipyo nga ang kandidato nga gipili makahatag gayud og kalambuan sa kumunidad.
Giangkon sa opisyal nga karung anaa pa kini sa pilot stage, kinahanglan gyud sila nga mahimong resourceful aron mapatuman ang programa ilabina kay wala kini gigahinan og pondo samtang limitado ra usab ang ilang mga personahe.
Apan bisan paman niini, malipayon ang opisyal tungod kay positibo man ang inisyal nga assessment sa programa diin gidayeg kini sa mga kabataan og magtutudlo.
Ang nasangpit nga assessment maoy gamiton nila sa pagpadayon sa programa.
Kini ilabina kay tinguha gayud nilang malakip kini sa curriculum dayung pasabot nga mas maminaw ang mga bata kung eapil kini sa ilang grading system.
