BUTUAN CITY – Gitugotan na sa usa ka bag-o Mosque sa nasod nga Bangladesh ang mga membro sa transgender hijra community nga maka sulod og maka ampo ang mga niini sa balay-alampoanan nga bag-ong gitukod sa pangamhanan alang kanila.
Kahibaloan nga gitukod ang maong mosque human sa dugay nga panahon nga wala tugoti ang maong komunidad nga makapartisipar sa mga pag-ampo sa normal nga mga mosque sa ilahang nasod. Nahimutang ang bag-ong mosque sa Mymensingh, amihanang bahin sa kaulohang Dhaka.
Sumala ni Sonia, 42, myembro sa transgender hijra community sa maong nasod nga wala niini damha nga maka ampo pa siya og balik sa mosque human nga gibutyag niini nga usa siya ka ‘hijra’, tawag sa mga transgender sa ilahang nasod, kansa maoy rason nga wala na siya pasudla sa mga balay-alampuanan.
Kahibaloan nga sukad niadtong tuig 2013, nag anam na og ka hatag ngadto sa mga hijras ang ilahang katungod sa politika, diin duna pay usa ka transgender nga na pili isip Mayor sa usa sa mga lungsod sa Bangladesh, ingon man girekognisar na usab sa maong nasod ang mga transgender kon hijras isip third gender. Apan taliwala sa maong mga katungod, wala pa gihapon mapapas ang mga gender-based violence nga nag tunhay sa maong dapit, kansa kanunay nga target kay ang mga sama nila Sonia nga hijras.
