BUTUAN CITY – Giransak sa daghang mga miyembro ang panimalay sa founder sa investment scam nga Forex Trading sa may Purok-3, Barangay Poblacion, Prosperidad, Agusan Del Sur kagahapon sa alas 8:40 sa buntag.
Sigon ni Police Lt. Col. Peddy Rollon, Hepe sa Prosperidad Municipal Police Station, gipa-verify niya ang taho nga daghang mga tawo ang nagdasok sa panimalay ni Dimber Dela Cruz Celis, usa ka babaye, menyo ug residente sa maong dapit.
Dinhe nasuta nga duna nay mga nakasulod nga miyembro sa Forex diin gibana-banang kapin sa usa ka gatus ka indibidwal ang nakabit-bit ug gamit gikan sa sulod sa maong panimalay.
Nasayran nga pipila ka semana na nga wala sa maong balay ang tag-iya ug bugtong mga caretaker ang nahabilin nga mibati ug dili tiaw nga kahadlok human sa pag-ransak sa daghang tawo.
Gilayong gitambagan sa Hepe ang katawhan sa maong dapit, nga i-turn-over ngadto sa police station ang ilang nakuhang mga butang tungod kay pagpangawat ang ilang gihimu.
Tungod niini, duna nay nagturn-over ug butang sama sa aparador, lingkuranan ug divider apan duna pay wala mi-turn-over sa ilang nakuha.
Giklaro usab sa opisyal nga daghang mga miyembro nga dili residente sa maong lugar.
Sa nakuhang video, makita ang daghang tawo nga pasulod sa maong panimalay ug sa mga nanggawas duna nay bitbit kining mga butang sama sa mga sinakong bugas ug uban pang mga gamit.
Nasayran usab nga nasuko ang maong mga miyembro tungod kay wala pa sila nakadawat ug pay-out sa ilang na-invest nga kwarta.
