BUTUAN CITY – Wala kaayo’y dakong epektong gibilin sa Caraga Region ang bagyong Aghon sa pag-agi niini sa rehiyon ning mi-aging semana.
Sa eksklusibong pakighinabi sa Bombo Radyo Butuan, gibutyag ni Ronald Anthony Briol, tigpamaba sa Office of the Civil Defense-Caraga nga base sa ilang pakig-alayon sa mga Provincial DRRMOs kon Disaster Risk Reduction and Management Offices, wala sila’y natalang damyos sa mga imprastraktura ingon man sa mga lifelines.
Gawas niini, wala usa’y na-ablihan nga evacuation center bisan pa man nga ila na kining gipa-andam daan.
Hinuon duna’y mga biyahe sa sakyanang pandagat ang gikansela ilabina sa mga gagmay nga klase kansa gibalik ra usab pagkasunod adlaw dihang atua na sa Visayas area ang bagyo.
Ang mga apektadong biyahidor, gipangtagaan og mga hot meals sa mga hingtungdang local government units.
