BUTUAN CITY- Nagpakita og paglaom ang bag-ong panukiduki sa Alemanya bahin sa tambal batok sa brain tumors diin sa 33 ka pasyente nga giapil sa eksperimento sa German Cancer Research Center ug uban pang ospital, 66% ang buhi pa human sa walo ka tuig ug 42% wala na usab motubo ang tumor.
Ang bakuna nga gihimo ni Michael Platten ug iyang team sa University Medical Center Mannheim nagtudlo sa immune system sa pag-atake sa genetic mutation nga makita sa high‑grade astrocytomas. Kini nga klase sa therapeutic vaccine nakapukaw sa T cells ug B cells aron supakon ang tumor cells.
Bisan pa sa positibong resulta, gipahimangnoan sa mga eksperto nga gamay ra ang sample ug kinahanglan pa og mas dako nga randomized study nga sugdan sa 2027 uban sa kapin 200 ka pasyente.
