BUTUAN CITY- Usa ka kumpirmadong kaso sa impeksyon sa Nipah virus ang gitaho usab sa Rajshahi Division, Bangladesh.
Sumala sa International Health Regulations National Focal Point, ang pasyente gihilantan niadtong Enero ug gikumpirma nga nataptan pinaagi sa mga laboratory test pipila ka adlaw ang milabay.
Base sa imbestigasyon, wala kini history sa pagbiyahe apan nakakaon og hilaw nga date palm sap, usa ka komon nga tinubdan sa impeksyon.
Sumala sa Ministry of Health and Family Welfare sa Bangladesh, 35 ka mga tawo nga nakakontak sa pasyente ang hugot nga gimonitor ug silang tanan nagnegatibo sa Nipah virus.
Nailhan ang Bangladesh nga adunay gagmay nga mga outbreak sa Nipah virus, kasagaran gikan sa Disyembre hangtod Abril, dungan sa pag-ani ug pagkonsumo sa date palm sap.
Ang gobyerno nagpatuman og mga lakang sa panglawas aron mapugngan ang pagkaylap sa sakit, lakip ang intensive surveillance ug impormasyon sa publiko.
Sa pagkakaron, giisip sa World Health Organization nga ubos ang risgo sa Nipah virus sa nasyonal, rehiyonal ug global nga lebel, ug ang posibilidad sa pagkaylap niini sa ubang mga nasud, ubos usab.
