BUTUAN CITY- Gireklamo ni House Prosecution counsel Atty. Lorna Kapunan sa Senate Impeachment Court nga wala tubaga sa defense team ang ilang mga mensahe ug wala ang mga niini nagpakita aron ikumpara ang mga acknowledgement receipts nga may kalabotan sa alegasyon sa misuse of confidential funds batok kang Vice President Sara Duterte.
Sa iyang manifestation sa ika-14 nga adlaw sa impeachment trial kaganiha Martes, Agosto 11, sigon ni Kapunan nga ang maong lihok mahimong magpakita og “bad faith” gikan sa depensa, kansa nangatarungan nga kulang sila sa abogado ug panahon aron matuman ang sugo sa korte.
Sumala ni Kapunan, misulat sila sa depensa niadtong Miyerkules aron mangutana kung kanus-a sila mahimong magkita, apan wala sila makadawat og tubag hangtod nahuman ang office hours niadtong Huwebes ug sa ulahi gisugyot ang Agosto 14, kung asa lapas na sa mga petsang girekomenda sa impeachment court.
Sa laing bahin, sigon sa defense counsel nga si Atty. Kristine Ferrer nga dili na kinahanglan ang maong pagkumpara tungod kay ang korte gihapon ang magbuot sa authenticity sa mga dokumento.
Sa tunga sa diskusyon, naghatag og pahiyom ang Presiding Officer nga si Senate President Francis Escudero sa dihang iyang gitul-id ang pulong nga “na-Indian,” ug dayong butyag nga mas tukma nga “na-ghost” si Kapunan tungod kay wala pa man sila nakasabot og petsa sa pagkita. Sa kataposan, gimandoan ni Escudero nga hatagan ang mga senator-judge og mga kopya sa mga dokumentong ebidensiya aron sila mismo ang makahimo sa pagkumpara.
