BUTUAN CITY – Dako ang pasalamat ni Gregorio Yongco Macalisang, taga Sta. Irene, Bayugan City. Agusan del Sur, human kini ming landing isip Top 4 sa bag-ohay lang minggawas nga Geodetic Engineers Licensure Examination, kansa nakuha niini ang 88.60% nga rating.
Sumala ni Gregorio nga wala matud pa nahimong babag kaniya ang kapobrehon alang sa pagkab-ot sa iyang mga pangandoy bisan pa man kon anak lamang siya sa usa ka construction worker ug mamaligyaay ug gulay, gani gihimo pa niini ug inspirasyon ang ilahang kalisod sa iyang pagtungha.
Dugang pa ni Macalisang, daan na niyang pangandoy nga maapil sa top notchers tungod sa kagustuhan niini nga masinati ang kalipay sa ilang mga seniors nga nag top usab sa maong board exam kaniadto. Proud usab kini nga migradwar isip usa ka iskolar sa TES kon Tertiary Education Subsidy sa CHED, tungod kay dako ang natabang niini ilabina sa pinansyal nga panginhanglan sa iyang pagskwela.
Kahibaloan nga karong tuiga pa lamang ning gradwar si Gregorio sa iyahang kurso, rason nga ning sabak gilayon kini sa iyahang board exam sulod lamang sa pipila ka mga bulan.
Ang Geodetic Engineers Licensure Examination gipahigayon niadtung Oktubre 25 hangtud 26 ning kasamtangang tuig, ug ning gawas ang resulta kagahapong adlawa, Nobyembre 6.
