BUTUAN CITY- Usa ka miyembro sa usa ka political family sa Iloilo ang lakip sa most wanted fraudsters sa Federal Bureau of Investigation kon FBI.
Nagtanyag ang mga awtoridad sa Estados Unidos og reward nga hangtud 150,000 dolyar o gibana-banang P9.2 million alang sa impormasyong mosangpot sa pag-aresto ug pagkonbikto kang Rey Grabato II.
Nalambigit matud pa si Grabato sa usa ka investment scam nga naka-ilad sa gibana-banang 2,000 investors ug nakakuha og kapin 650-milyones dolyar gikan Pebrero 2018 hangtud Enero 2022, kauban ang co-defendant nga si Thomas Nicholas Salzano.
Nag-atubang kini sa pipila ka federal charges sa US, lakip ang securities ug wire fraud, conspiracy, ug tax fraud. Nagpagawas ang US District Court sa Newark og warrant alang sa pagka-aresto niini niadtong Oktubre 12, 2022.
Sumala sa FBI ug US Department of Justice, kanhi presidente ug majority owner si Grabato sa National Realty Investment Advisors LLC, usa ka real estate investment firm sa New Jersey.
Gi-akusaran usab kini nga mingsulay pag-ikyas sa 26-milyones dolyar nga tax liabilities sulod sa 15 ka tuig.
Si Grabato anak nila Mina Mayor Rey Grabato ug kanhi mayor Lydia Grabato. Sigon usab sa pamilya niini, ming-uli kini sa Mina niadtong Mayo 2022 human mipa-ilawom og brain surgery sa US human sa usa ka aksidente.
