BUTUAN CITY – Duha pa ka clay tournaments ang apilan ni Pinay tennis sensation Alex Eala isip pagpangandam alang sa prestihiyosong French Open nga himoon sa Mayo sa Paris, France.
Apil si Eala sa WTA Porsche Tennis Grand Prix nga himoon sa Porsche Arena sa Stuttgart gikan Abril 13 hangtod 19 kansa usa ka WTA 500 event.
Dili sama sa iyang mga mi-aging torneo, mu-agi si Eala sa qualifying round aron makasulod sa main draw ka-uban ang uban pang players sama nila Zeynep Sonmez ug Alycia Parks.
Human sa Stuttgart event, makigtigi usab si Eala sa Mutua Madrid Open, usa ka WTA 1000 tournament nga himoon sa Madrid, Spain gikan Abril 21 hangtod Mayo 3.
Sa Madrid Open, makigsangka siya sa mga top players sama nila Aryna Sabalenka (world No. 1), Coco Gauff, Amanda Anisimova, ug Mirra Andreeva.
Sa pagkakaron, tulo ka clay tournaments ang nakalinya alang kang Eala, apil na ang Linz Open sa Austria gikan Abril 6 hangtod 12. Kinahanglan makab-ot ni Eala ang maayong resulta sa mga clay tournaments aron makabalik sa Top 30 sa WTA rankings, nga importante aron makakuha siya og awtomatikong slot sa main draw sa French Open.
Sa pagkakaron, nahulog siya sa No. 45 sa WTA live rankings human ma-expire ang iyang puntos gikan sa Miami Open sa miaging tuig, diin nakaabot siya sa semifinals.
