BUTUAN CITY – Gipahibalo sa mga tigdukiduki sa Estados Unidos nga nakahimo sila og bag-ong mga viruses pinaagi sa tabang sa artificial intelligence (AI), usa ka unang kalampusan sa siyensya nga mahimong makatabang sa pagpalambo sa mga medikal nga pagtambal apan nagpatumaw usab og kabalaka bahin sa posibleng peligro sa maong teknolohiya.
Sumala sa pagtuon, gigamit sa mga siyentista gikan sa Stanford University ug sa Broad Institute of MIT ug Harvard ang usa ka natural nga phage o virus nga moatake og bakterya isip hulmahan aron makamugna og liboan ka genome gamit ang AI.
Gikan niini, ilang gihimo ug gisulayan sa laboratoryo ang dul-an sa 300 ka sintetikong genome, diin 16 niini ang napamatud-ang mahimong mabuhi o “viable” nga virus.
Sa ilang mga pagsulay, nakita nga ang kombinasyon sa sintetikong mga virus mas epektibo sa pagpatay sa E. coli bacteria kumpara sa natural nga mga virus.
Matod sa mga tigdukiduki, ang ilang pamaagi mahimong makatabang sa paghimo og mas epektibong phage therapies batok sa mga bakterya nga dali mausab ug mahimong pundasyon sa pagdisenyo sa mas komplikado nga mga genome sa umalabot.
