BUTUAN CITY – Gikumpirma ni Agusan del Sur Governor Santiago ‘Santi’ Cane Jr nga naghuwat na lang sila sa pag-abot sa tanang mga delegado gikan sa nagkada-iyang rehiyon sa nasud samtang nagkaduol na ang pagsugod sa Palarong Pambansa 2026 nga himuon karong Mayo 24.
Kini tungod kay seinto-porsiento nang han-ay ang tanang gikinahanglan alang sa pag-cater sa mga delegado gikan sa ilang mga billeting quarters, playing venues apil na ang pagsundo sa ubang mga delegadong wala pa maka-abot sa ilang lalawigan.
Sa eksklusibong pakighinabi sa Bombo Radyo Butuan, gipadayag sa gobernador nga wala’y angayang kabalak-an ilabina sa seguridad sa tanang mga delegado tungod kay bisan ang ilang mga billeting quarters duna usa’y mga CCTV sama sa mga gipangmontar nila sa mga playing venues ug sa tibuok Datu Lipus Makapandong Democrito O Plaza Sports Complex kansa maoy main venue sa national sporting event.
Bisan ang ilang mga medical teams, mga gamitong pasilidad, generator sets, ug uban pang panginahanglanon sa mga delegado, plastado ug naghulat na lang sa pormal nga pagsugod sa ika-66 nga edisyon sa maong padula.
Giklaro sa gobernador nga duna na usab sila’y gimontar nga mga dagkong generator sets sa matag-billeting quarter aron dili mahasol ang mga delegado ugaling duna’y brownout nga matigayon atol sa Palaro period.
