BUTUAN CITY – Inanay nang gipangandaman sa probinsyal nga panggamhanan sa Agusan del Norte ang gikatakdang pagpalu-ag sa enhanced community quarantine human gimando ni Pangulong Rodrigo Duterte nga ipa-ilalom na sa general community quarantine ang mga lugar nga masakop sa mga low-risk sa COVID-19 tungod sa minos nga kaso sa makamatay nga coronavirus.
Sa eksklusibong pakighinabi sa Bombo Radyo Butuan, gipadayag ni Governor Dale Corvera kinsa mao usa’y chairman sa Regional Task Force-One Caraga Shield, nga nagsugod na sila paghan-ay sa executive order nga iyang ipagawas sa Mayo 1 kansa magkonsidera sa mga lakang nga angayang ipatuman aron dili mabutang sa alanganin ang katawhan.
Kini ilabina nga bag-uhay pa lang gipa-ilalom sa enhanced community quarantine ang lalawigan dungan sa uban pang mga lalawigan sa entiro rehiyon sa Caraga.
Ila karong gikaproblemahan tungod kay base sa kamanduan sa pangulo, wala na’y mga lugar sa nasud nga magpatuman og enanced community quarantine kung dili aprubahan sa nasudnong kagamhanan.
Gihimo niining basehan sa iyang kabalaka uban sa kinatibuk-ang pwersa sa One Caraga Shield ang mao pa lama’y pagbutho sa mga nagpositibo sa maong kaso gawas nga duna pa’y mga suspect cases nga angayan pang tutukan ug kinahanglan pang makumpirma pinaagi sa mu-abutay pa nga mga rapid test kits nga ilang gi-order nga gitagana nila alang sa himuong mass testing.
