BUTUAN CITY – Maglunsad ang probinsyal nga panggamhanan sa Surigao del Sur og usa ka charity event atol sa Valentine’s day nga gitawag og “Adopt a Child on Hearts’ Day.”
Gi-organisa na sa provincial tourism council uban ni Surigao del Sur Governor Vicente “BB” Pimentel, Jr. ang charity event nga ipahigayon sa Capitol grounds sa dakbayan sa Tandag karong Pebrero 13 hangtod 15.
Sumala ni Maryvil Cruz, provincial tourism chief, gisugdan na nila niadtong Pebrero 5 ang pagpangdawat sa mga gustong moapil sa maong kalihukan.
Nasayrang dili moubos sa 50 ka mga undernourished ug less-privileged nga mga bata nga anaa sa squater areas ang gikatakdang kuhaon sa City Nutrition and Social Welfare and Development (NSWD) Offices sa maong adlaw uban sa pagtugot sa ginikanan alang sa usa ka adlaw nga kontrata kansa pirmahan tali sa mosagop ug sa opisina sa NSWD nga maoy nanguna sa maong katuyuan.
Tumong niini nga mahupay bisan sa usa lang kaadlaw ang nasinati nga kagutom sa mga bata kinsa nag antos sa kalisud. (Rolan Janea)
