BUTUAN CITY – Nagdesisyon nang mu-atras si kanhi Miss Universe Philippines 2023 Michelle Dee sa iyang gikatakdang pag-apil sa Miss Grand International All Stars human siya mi-agi sa operasyon nga appendectomy o pagtangtang sa appendix.
Gikumpirma ni Dee ang iyang pag-atras sa maong kompetisyon aron hatagan og igong panahon ang iyang kaugalingon sa pagpahulay ug hingpit nga pagkaayo gikan sa operasyon.
Kahinumdoman nga gidala sa ospital si Dee niadtong Nobyembre 9 human makasinati og grabeng kasakit sa tiyan, hinungdan nga gikinahanglan siyang operahan dayon pinaagi sa emergency appendectomy.
Gimandoan usab siya sa iyang medical team nga sundon ang gitakdang panahon sa iyang recovery ug likayan una ang dugay nga pisikal nga kalihokan ug bug-at nga ehersisyo aron malikayan ang posibleng komplikasyon samtang nagpaayo.
Gidawat usab sa beauty queen ang panginahanglan nga unahon ang iyang panglawas ug hingpit nga pagkaayo rason sa iyang pag-atras sa maong kompetisyon.












