BUTUAN CITY – Mas gipalig-on sa Department of Health kon DOH-Caraga ang holistic rehabilitation program alang sa mga Person Who Use Drugs (PWUDs) nga naghatag og pagtagad dili lamang sa ilang pisikal nga pagka-ayo kondili lakip usab sa mental, emosyonal ug espirituhanong kaayohan.
Gipangunahan kini sa DOH-Drug Treatment and Rehabilitation Center (DTRC) sa Surigao City atol sa pagsaulog sa Drug Abuse Prevention and Control Week.
Gika-ingong importante nga ma-monitor dili lamang ang physical condition sa mga pasyente kondili usab ang ilang mental health ug taras, tungod kay ang dugay nga paggamit sa ilegal nga droga mahimong makaapekto sa utok ug pangisip sa usa ka tawo.
Gihatagan usab og importansya sa DOH ang suporta ug pagdawat sa pamilya ug komunidad aron matabangan ang mga PWUDs nga makabangon, makabalik sa normal nga pagkinabuhi ug ma-integrate pag-usab sa katilingban.
Pinaagi niini, giklaro sa ahensya nga ang kampanya batok sa ilegal nga droga dili lamang nakasentro sa pagpugong sa paggamit niini, kondili lakip usab ang rehabilitasyon ug paghatag og ikaduhang higayon sa mga apektadong indibidwal.












