BUTUAN CITY – Gilusad sa Pag-IBIG Fund ang “Loan to Win” promo nga naghatag og oportunidad sa mga miyembro nga makadaog og cash prizes pinaagi sa ilang pagkuha o pag-renew sa Multi-Purpose Loan o MPL.
Ubos niini nga promo, adunay higayon ang mga kwalipikadong miyembro nga makadaog og cash prize nga moabot sa 50 mil pisos.
Duha ka raffle draws ang gitakda ubos sa maong promo kondiin ang una nga tawgong “Pag-IBIG AnniverSWERTE!” ipahigayon sa Disyembre 14, alang sa mga MPL loans nga ma-aprubahan gikan Nobyembre 1 hangtod 30, 2026.
Samtang ang ikaduhang draw nga tawgong “Panalo sa Pag-IBIG!” ipahigayon sa Pebrero 14, 2027, alang sa mga loan nga ma-aprubahan gikan Disyembre 1, 2026 hangtod Enero 31, 2027.
Lakip sa mga premyo ang 50 mil pesos alang sa first prize, 25 mil pesos sa second prize, 15 mil pesos sa third prize ug 5-mil pisos alang sa fourth prize. Adunay kinatibuk-ang 540 ka mga mananaug sa duha ka raffle draws.
Dili na kinahanglan nga magparehistro pa og bulag alang sa raffle tungod kay awtomatikong maapil ang mga kwalipikadong miyembro higayong ma-aprubahan ang ilang MPL application.
Aduna usa’y dugang raffle entries alang sa mga first-time borrowers, mga mag-renew sa ilang loan ug mga mo-apply online pinaagi sa Virtual Pag-IBIG nga adunay online employer certification.
Ang Multi-Purpose Loan o MPL usa ka matang sa pautang nga mahimong magamit sa mga miyembro alang sa nagkalain-laing panginahanglan sama sa gasto sa edukasyon, pagpa-ospital o pagpatambal, pagpa-ayo sa balay, puhunan sa negosyo ug uban pang panginahanglan sa pamilya.
Apan gipahinumdoman ang publiko nga dili libre nga kwarta ang maong promo tungod kay kinahanglan gihapon nga bayran sa mga miyembro ang ilang gihulam nga kantidad subay sa gitakdang loan terms.
Ang posibilidad nga makadaog sa raffle usa lamang ka dugang nga benepisyo alang sa mga kwalipikadong mangutangay.












