BUTUAN CITY – Gitay-og sa magnitude 5.4 nga linog ang kadagatan sa Siargao Islands, General Luna, Surigao del Norte, pasado alas-9:41 kagabii.
Nasuta ang lokasyon niini sa gilay-ong 40 kilometros sa sidlakan sa General Luna nga 16 kilometros ang gilawmon og tectonic ang origin.
Nabati usab ang pagtay-og sa pipila ka parte sa Leyte ug Southern Leyte, base sa natalang instrumental intensities.
Natala ang Intensity III sa mga lungsod sa Abuyog ug Hilongos, Leyte, lakip na usab sa Sogod ug San Francisco, Southern Leyte.
Samtang Intensity II ang natala sa Dulag ug Baybay, Leyte, ug Hinundayan, Southern Leyte. Intensity I usab ang nabati.
Sa reported intensities, Intensity IV sa General Luna, Surigao del Norte ingon man ang lungsod sa Lanuza, sa Surigao del Sur ug Talacogon, Agusan del Sur.
Intensity III usab sa siyudad sa Surigao, Surigao del Norte; Tandag City sa Surigao del Sur ug sa Butuan City.
Samtang Intensity I usab sa Bislig CIty ug lungsod sa Cagwait, sa Surigao del Sur.
Daghang mga aftershocks na ang natala human sa pagtay-og diin ang pinakakusog mitala sa 4.6 magnitude.












