BUTUAN CITY – Gitudlo ni Pangulong Ferdinand Marcos Jr. si Supreme Court Associate Justice Rodil Zalameda isip sunod nga chief justice sa Korte Suprema sa Pilipinas, base na sa pahibalo ni Presidential Communications Office Secretary Lino Cayetano.
Hulipan ni Zalameda si Chief Justice Alexander Gesmundo nga gikatakdang moretiro ugmang adlawa, Nobyembre 6.
Nasayrang kapin tulo na ka dekada nga nagserbisyo si Zalameda sa hudikatura, sugod isip opisyal sa korte ug piskal, hangtod sa iyang pagserbisyo sa Court of Appeals ug Korte Suprema.
Sigon ni Cayetano, nagtuo ang Pangulo nga tumanon ni Zalameda ang iyang mga katungdanan uban ang integridad, walay pagpihig ug hingpit nga pagtuman sa balaod.
Nagpasalamat usab ang Malacañang kang Gesmundo tungod sa iyang dugay nga serbisyo sa hudikatura ug sa nasud.
