BUTUAN CITY- Gipadayag ni Philippine Sports Commission kon PSC Chairman John Patrick “Pato” Gregorio ang dakong garbo ug kalipay sa Pilipinas tungod sa pag-host sa Siargao sa unang World Surf League (WSL) Championship Tour Philippines Pro, diin magtapok ang mga world-class surfer aron makigkompetensiya sa bantugang surfing spot nga Cloud 9.
Atol sa press conference sa Café Loka, gipasiugda ni Gregorio ang kamahinungdanon sa maong kalihokan kansa nagpakita sa kalidad sa mga balod sa Pilipinas, maayong pag-abiabi sa mga bisita ug kapasidad sa nasud sa pagpahigayon og internasyonal nga kompetisyon.
Gipasalamatan usab niini ang suporta sa Office of the President, Department of Tourism, mga lokal nga panggamhanan sa Surigao del Norte ug nagkadaiyang ahensiya sa gobyerno nga nagtinabangay aron masiguro ang malampusong pagpahigayon sa maong kalihokan.
Matud pa niini, ang pag-apil sa mga internasyonal nga atleta sa lokal nga komunidad ug ilang pagtilaw sa mga pagkaong rehiyonal nagpakita sa tinuod nga diwa sa sports tourism, samtang gilaoman nga ang maong kompetisyon nga magpadayon karong Nobyembre makapalig-on sa dungog sa Pilipinas isip destinasyon sa mga dagkong kalihokan sa sports ug makadasig sa bag-ong henerasyon sa mga Filipino surfer.
