BUTUAN CITY- Masinati na ugmang adlawa ang dakong pagsaka sa presyo sa gasolina nga ming-abot sa P3.50 kada litro, samtang mokunhod usab og P1 ang diesel, ug P1.90 matag litro sa kerosene, base sa pinakabag-ong price adjustment nga gitakda sa Department of Energy (DOE).
Sumala ni Jetti Petroleum Inc. president Leo Bellas, ang pagsaka sa gasolina nalambigit sa hugot nga suplay sa Asian market ug pagmahal sa gasto sa pag-angkat og krudo, samtang miarang-arang na ang suplay sa diesel.
Gipasidaan usab niini nga posibleng magpadayon ang pagsaka ug kunhod sa presyo sa petrolyo tungod sa tensiyon sa geopolitikal nga sitwasyon sa Middle East.
Bisan pa niini, gikumpirma sa DOE nga adunay igo nga imbentaryo sa suplay sa petrolyo ang nasud nga mokabat sa 52.95 ka adlaw nga konsumo, base sa datos niadtong Oktubre 30.
Samtang, mikabat na sa P1.17 bilyon ang nahatag nga fuel subsidy sa kapin 109,000 ka benepisyaryo nga mga drayber ug operator sa public utility vehicles (PUV), isip tabang sa pag-atubang sa padayong pag-usab-usab sa presyo sa gasolina.
