BUTUAN CITY- Minghimo og kasaysayan sa lokal ug internasyonal nga entablado sa surfing ang Pilipinas human gipildi sa Siargao-born surfer nga si John Mark “Marama” Tokong ang Brazilian nga si Samuel Pupo sa opening round sa World Surf League Championship Tour Philippines Pro nga gipahigayon sa Cloud 9, Siargao.
Nakab-ot ni Tokong ang kinatibuk-ang puntos nga 16.60, lakip ang pinakataas nga puntos sa usa ka balod nga 8.60, kansa nagpakita sa kahibalo ug kahanas niini sa mga balod sa iyang kaugalingong baybayon.
Misunod usab sa iyang kadaugan ang lokal nga surfer nga si Jayuard Alciso kinsa nakapildi sa French Olympic gold medalist nga si Kauli Vaast pinaagi sa 12.93 puntos, hinungdan nga silang duha nakasulod sa Round 2.
Sunod nga atubangon ni Tokong ang Australianong si Ethan Ewing, samtang makigsangka si Alciso batok sa Japanese surfer nga si Kanoa Igarashi, sa ilang nagpadayon nga kompetisyon kansa nagdala og garbo sa mga Pilipino sa internasyonal nga surfing stage.
