BUTUAN CITY – Opisyal nang gi-ablihan sa lokal nga kagamhanan sa Cloud 9, General Luna, Siargao Islands, lalawigan sa Surigao del Norte ang napulo ka adlaw nga World Surf League kon WSL Championship Tour event – Philippines Pro nga matapos sa Nobyembre 9
Mudula si 4th time Siargao International Surfing Cup champion John Mark Tokong nga gi-ila nga King of Cloud 9 sa Pilipinas isip Wild Card ka-uban sila Jayuard Alciso ug Mara Lopez, aron mubitbit sa bandila sa Pilipinas.
Ilang maka-agbat ang mga banggi-itang surfers sama sa mga Brazilian surfers nga sila world No. 1 Yago Dora, ug world champions Gabriel Medina, Italo Ferreira ug Filipe Toledo, lakip si Miguel Pupo.
Mu-apil usab si Leonardo Fioravanti sa Italy ug Kanoa Igarashi sa Japan samtang sa women’s division, anaa sila Molly Picklum sa Australia – ang nakadaog sa Portugal ug kasamtangang nagkupot sa Yellow Jersey – kauban ang mga American surfer nga sila Caroline Marks, Erin Brooks, Gabriela Bryan ug Lakey Peterson.
Muhimo og kasaysayan ang General Luna, Siargao Islands sa Surigao del Norte, tungod kay kini ang unang pag-host sa Pilipinas nga World Surf League o WSL Championship Tour event – Philippines Pro nga pangunahan sa Philippine Sports Commission o PSC.
