BUTUAN CITY -Wala pa’y nadawat nga kumpirmasyon ang Department of National Defense kon DND kung motambong ba ang China sa ika-20 nga Association of Southeast Asian Nations kon ASEAN Defence Ministers’ Meeting o ADMM nga ipahigayon sa Lapu-Lapu City, Cebu gikan karong adlawa Oktubre 28 hangtod ugma Oktubre 29.
Sigon ni DND Assistant Secretary Arsenio Andolong, ang ADMM mao ang pinakataas nga mekanismo sa konsultasyon ug kooperasyon sa natad sa depensa sa tibuok rehiyon sa ASEAN.
Ang Pilipinas maoy nagkupot sa pagkapangulo sa ika-20 ADMM ug ika-13 ADMM-Plus karong tuiga, ubos sa pagpangulo ni Defense Secretary Gilberto Teodoro Jr., nga nagdala sa temang “Navigating Our Future Together.”
Lakip sa ADMM-Plus ang walo ka dialogue partners nga mao ang Australia, China, India, Japan, New Zealand, South Korea, Russia ug Estados Unidos.
