BUTUAN CITY – Nasubasta sa kantidad nga $47.3 milyon o kapin P2.7 bilyon ang fossilized skeleton sa usa ka bag-ong nailhang dinosaur nga kaniadto nasayop og pag-ila isip usa ka batan-ong Tyrannosaurus rex.
Ginganlan og “Jodi” ang maong skeleton nga 10 ka tiil o tulo ka metros ang katas-on, ug gisubasta kini sa Sotheby’s sa New York.
Usa ka tuig human gipamatud-an sa mga tigdukiduki nga ang fossil iya sa lahi nga genus, gibutang na kini sa subasta. Ang maong dinosaur usa ka carnivore nga nabuhi sa Late Cretaceous period.
Gibana-bana una nga mahalin kini og labing menos 9-milyones dolyares sa wala pa ang subasta, apan misaka pag-ayo ang presyo human sa 12 minutos nga bidding taliwala sa unom ka interesado nga pumapalit.
Matud sa Sotheby’s, ang Jodi usa ka “exhibition-ready” nga skeleton nga adunay 191 ka fossil-bone elements ug halos kompleto ug maayong pagkapreserba nga bagol-bagol.
Gidugang sa auction house nga ang Nanotyrannus usa lamang sa tulo ka ingon niini nga skeleton nga nailhan sa siyensya.
Wala pa gibutyag ang identidad sa nakapalit niini, apan nahimo nang ikaduhang labing mahal nga dinosaur fossil nga nabaligya sukad, sunod sa Tyrannosaurus rex nga ginganlag Gus nga nahalin og $50.1 milyon niadtong Hulyo.
Ang pagbaligya kang Jodi nakapukaw pag-usab sa debate sa scientific community kung ang mga fossil sa dinosaur angay ba ibaligya sa pribado o ipakita sa publiko.
