BUTUAN CITY-Lauman nga mosaka sunod semana ang presyo sa diesel ug kerosene, samtang posibleng moubos ang presyo sa gasolina, base sa inisyal nga pagbana-bana kinatibuk-ang average sa Mean of Platts Singapore (MOPS) ug sa foreign exchange rates karong semanaha.
Sumala sa upat ka adlaw nga trading, gibanabanang mosaka og P2.50 hangtod P3.50 kada litro ang diesel, samtang posibleng moubos og P0.50 hangtod P1.50 kada litro ang gasolina ug mosaka usab og P0.50 hangtod P1.50 kada litro ang kerosene.
Sa trading period gikan Oktubre 19 hangtod 23, misaka og ₱3.30 kada litro ang presyo sa diesel ug ₱1.90 ang kerosene, samtang mikunhod og ₱0.70 kada litro ang gasolina sa world market.
Mikalit og saka ang presyo sa lana sa kataposang semana tungod sa kabalaka nga ang bag-ong panagbangi tali sa Estados Unidos ug Iran, lakip ang mga pag-atake nga naghulga sa produksiyon sa lana sa Saudi Arabia ug sa alternatibong mga ruta sa eksport, mahimong makabalda sa suplay sa enerhiya gikan sa Middle East.
Gilauman nga ipatuman ang gibanabanang kausaban sa presyo sa mga produktong petrolyo sa Martes, Oktubre 27, apan mahimo pang mausab ang kantidad depende sa kataposang kalkulasyon sa mga kompaniya sa lana.
