BUTUAN CITY – Nagkamamo karon ang mga ospital sa Taiz governorate sa Yemen human grabeng naapektuhan sa gubat rason nga naglisod na sila paghatag og tambal ug pagtambal sa mga pasyente tungod sa grabe nga kakulang sa lana, oxygen, mga tambal ug uban pang suplay medikal.
Alayon niini, nanawagan karon ang World Health Organization (WHO sa international community nga molihok dayon aron mapadayon ang pagluwas sa kinabuhi sa liboan ka mga pasyente bisan pa sa limitado nga access sa mga serbisyong medikal.
Sigon sa WHO, 42 ka mga health facilities sa siyudad sa Taiz ang nag-report og grabeng kakulang sa mga medical supplies.
Dugang pa niini, ang kakulang sa lana nakasamok usab sa pagpa-andar sa mga bomba sa tubig ug mga serbisyo sa sanitasyon hinungdan nga mas misaka ang risgo sa pagkaylap sa kolera ug uban pang mga sakit diha sa libuang mga tawo nga napalayas sa ilang mga puy-anan tungod sa gubat.
Nanawagan ang WHO nga hatagan dayon og luwas, padayon ug walay babag nga agi-anan ang mga hinabang nga padulong sa Taiz pinaagi sa tanang posibleng ruta.
Gi-awhag usab niini ang dinaliang paghatag og pondo aron mapun-an pag-usab ang kritikal nga mga suplay ug mapadayon ang importanteng serbisyo sa panglawas.
