BUTUAN CITY-Patay ang usa ka Pilipino ug usa ka Nepali human maigo sa nangahulog nga mga tipik sa drone nga gi-intercept sa air defense sa Saudi Arabia samtang misulay kini sa pag-atake sa Shaybah oilfield sa Saudi Aramco niadtong Miyerkules, sumala sa usa ka tinubdan.
Duha pa ka langyaw, usa ka Pakistani ug usa ka Indian, ang nasamdan sa maong insidente, apan wala maapektohi ang operasyon sa oilfield.
Sa kasamtangan, naghulat pa ang Overseas Workers Welfare Administration kon OWWA sa opisyal nga kumpirmasyon gikan sa mga awtoridad sa Saudi Arabia ug Saudi Aramco kalabot sa pagkamatay sa Pilipino, ug mipasalig nga mohatag og tukmang tabang sa pamilya sa biktima.
Samtang, 84 ka overseas Filipino workers kon OFWs ang gipapauli sa Pilipinas niining semanaha tungod sa nagkagrabeng tensiyon tali sa Saudi Arabia ug sa rebeldeng Houthi.
