BUTUAN CITY – Sugdan na karung adlawa ang upat ka adlaw nga Exercise Surigao Sentinel 2026 nga himoon sa Surigao Strait, Surigao City, ug sa lalawigan sa Dinagat Islands.
Kini mao ang hini-usang pagbansay sa militar ug nagkadaiyang ahensya sa gobyerno nga gipangulohan sa eastern Mindanao Command sa Armed Forces of the Philippines (AFP) dungan sa paghandom sa ika-82 nga anibersaryo sa makasaysayanong Battle of Surigao Strait.
Una nang giklaro ni LCol Joe Patrick Martinez, tigpamaba sa 4th Infantry ‘Diamond’ Division, Philippine Army nga dili kini preparasyon sa giyera hinoon nakatutok kini sa pagresponde sa mga posibleng emerhensyang mahitabo tungod kay apilan man usab kini sa ubang mga law enforcement agencies, mga local government units ug civil organizations.
Dugang ni Col Martinez, kabahin kini sa ilang add-on samtang mag-transition sila ngadto sa external defense operation sa armadong kusog sa nasud.
Apil sa ilang himuong simulation ang pag-practice sa ilang communication lines aron masayran ang paagi sa panag-istorya depende sa senaryo nga himuon aron masiguro ang saktong pagresponde kondiin mulambigit niini ang mga naval ships ug mga frigates.
Duna usa’y mga simulations kung duna’y mga hulgang mahitabo rason nga karon pa lang, gipahibalo na ang mga mangingisda nga managat sa Brgy Malvar, Dinagat islands province tungod kay duna may himuong live fires.
Gipahibalo na usab ang mga residente sa mga gitawag nilang areas of jurisdictions aron masiguro nga wala ang ilang presensya sa ingon luwas ang tanan atol sa exercises ug dili mabalda ang ilang exercises.
