BUTUAN CITY – Sugdan na ugmang adlawa, Huwebes, sa 4th Infantry “Diamond” Division, Philippine Army ang Exercise Surigao Sentinel 2026 nga ipahigayon matapos sa Oktubre 25 sa Surigao Strait, nga naglangkob sa kadagatan sa Surigao City, Surigao del Norte ug Dinagat Islands.
Sigon ni Lieutenant Colonel Patrick Martinez, tigpamaba sa maong dibisyon, kabahin kini sa paghandum sa ika-82 nga anibersaryo sa Battle of Surigao Strait, ubos sa tema nga “Beyond the Strait: Converging Historical Legacy and Multi-Domain Security.”
Sa eksklusibong pakighinabi sa Bombo Radyo Butuan, gipahayag sa opisyal nga sulod sa upat ka adlaw nga military exercise ang pagpakita sa ilang mga operasyon sa nagkalain-laing larangan, lakip na ang paghatag og tabang sa mga nanginahanglan, pagtubag sa mga emerhensiya ug kalamidad, search and rescue operations, ug civil-military operations.
Iapil usab sa maong kalihukan ang mga military assets sa Philippine Navy, Philippine Air Force ug Philippine Army, uban sa suporta sa mga lokal nga panggamhanan ug mga civic organizations.
Gipasabot ni Lt. Col. Martinez nga tumong sa maong ehersisyo ang pagpalig-on sa kapasidad sa nagkalain-laing ahensiya aron mas paspas nga makatubag panahon sa emerhensiya, sama sa mga insidente sa linog ug uban pang kalamidad.
Kabahin usab kini, matud pa, sa mga lakang sa Armed Forces of the Philippines sa pagbalhin ngadto sa mas nakapokus nga operasyon alang sa external o gawasnong depensa sa nasud.
