Butuan City – Kumpirmado nang nakagawas na sa nasud ang gambling tycoon nga si Charlie “Atong” Ang pinaagi sa “backdoor,” sumala ni Department of the Interior and Local Government kon DILG Secretary Jonvic Remulla.
Mibalibad una nga maghatag og dugang detalye si Remulla mahitungod sa eksaktong petsa ug pamaagi sa pagsibat ni Ang tungod kay padayon pa ang gihimong imbestigasyon sa mga awtoridad.
Wala usab una gibulgar sa opisyal ang katapusang natumbok nga nahimutangan sa negosyante samtang gipangeta pa gihapon kini sa balaod.
Gipangeta si Ang tungod sa kalambigitan niini sa gitaho nga pagdagit ug pagpatay sa kapin 34 ka sabungero nga matud pa midayu sa mga sabongan nga iyang negosyo niadtong 2021 hangtud 2022.
Girekomenda sa Department of Justice ang pagduso og 26 ka ihap sa kidnapping batuk kang Ang ug sa kapin 21 pa ka indibidwal, lakip na ang 15 ka pulis human gibulgar sa usa ka testigo nga gitook og gilabay ang mga biktima sa Taal Lake sa Batangas sa matud pa mando sa negosyante.
