BUTUAN CITY- Pormal na nga mingsulod sa Philippine Area of Responsibility (PAR) ang Super Typhoon Champi kaganiha sa may alas 10:40 sa buntag ug gihatagan kini og lokal nga pangalan nga “Rosal.”
Kataposang nakit-an ang mata sa bagyo sa distansyang 1,385 kilometro sa sidlakang Central Luzon samtang minglihok kini pa-ingin sa West Northwestward sa gikusgon nga 25 kilometro matag oras.
Ang bagyo adunay gikusgon sa maximum sustained winds nga 185 kilometro matag oras duol sa sentro ug adunay gustiness nga mo-abot sa 230 kilometro matag oras.
Tungod sa pagsulod sa bagyo, gi-isa na ang Wind Signal No. 1 sa Batanes, sidlakang bahin sa Babuyan Islands (Babuyan Is., Camiguin Is., Didicas Is.), sidlakang bahin sa mainland Cagayan (Santa Ana, Gonzaga, Lal-Lo, Santa Teresita, Camalaniugan, Aparri, Buguey, Gattaran, Baggao, Peñablanca), amihanang-sidlakang bahin sa Isabela (Maconacon, Divilacan, Palanan, San Pablo, Cabagan, Santa Maria, Tumauini, Ilagan City), ug sa amihanang-sidlakan bahin sa Catanduanes (Pandan, Bagamanoc, Panganiban, Viga, Gigmoto).
Gani, gipahimangnuan ang mga residente ug lokal nga panggamhanan sa maong lugar nga mahimong ug padayon nga magmonitor sa weather bulletin alang sa kaluwasan sa tanan.
