BUTUAN CITY – Mas sayon na karon alang ang pagkuha og tambal ug pagpa-check-up human na-ablihan ang Lumbocan Main Health Center – ang ikawalo nga Main Health Center sa Butuan City.
Direktang makabenepisyo niini ang mga residente sa Barangay Ambago, Lumbocan ug Masao pinaagi sa mas duol nga serbisyong medikal.
Maghatag ang pasilidad og maternal ug child care, serbisyo sa dental health ug reproductive health, ug mga programa batok sa tuberculosis, diarrhea, sexually transmitted diseases, leprosy ug schistosomiasis.
Anaa usab dinhi ang basic laboratory services, minor surgery ug birthing clinic aron matubag ang nagkalainlaing panginahanglan sa mga pasyente.
Kabahin kini sa paningkamot sa City Government of Butuan aron masiguro nga ang mga Butuanon makadawat og serbisyong panglawas nga duol, sayon ma-access ug makatubag sa ilang panginahanglan.
