BUTUAN CITY-Gipagawas na kaganiha sa hapon Sabado, Oktubre 10, sa Asian Contents & Film Market kon ACFM sa Busan, South Korea, ang opisyal nga trailer sa pelikulang “Ang Florante at Laura ni Balagtas” o “Florante and Laura,” nga gihimo sa FEAST Foundation.
Dungan usab kining ipasalida sa Pilipinas pinaagi sa YouTube ug Facebook Video Premiere. Uban sa temang “Love, our last revolution,” tumong sa pelikula nga ipabalik sa panumdoman sa mga tumatan-aw ang walay kupas nga sugilanon sa gugma, pagbudhi, ug kaisog sa pagbungkag sa pagkabahinbahin sa katilingban.
Gibituonan kini nila JC de Vera isip Florante, Shaina Magdayao isip Laura, Royce Cabrera isip Aladin, ug Gillian Vicencio isip Flerida, uban sa ubang mga aktor, ubos sa pagsulat ug pagdumala ni Alvin Yapan.
Gikan sa klasiko nga obra sa Pilipinong magbabalak nga si Francisco Balagtas, dad-on sa pelikula sa dakong tabing ang mga panagbangi ug pagbati nga nagpabiling may kalabotan sa kasamtangang panahon, lakip ang pagsalig, pagpanalipod sa gituohan, ug pagpadayon sa kalooy taliwala sa pagdumot ug pag-ilog sa gahom.
