BUTUAN CITY – Duha ka tawo ang angol samtang wala pay gikumpirmang namatay human mi-igo ang magnitude 7.7 nga linog sa Panama samtang dul-an na sa 100 ka mga aftershocks ang natala human sa pasi-unang linog, lakip ang usa nga milapas sa magnitude 6.0.
Natala ang grabeng kadaot sa pipila ka bahin sa nasud, diin adunay mga bilding ug dalan nga naguba o nahugno. Sa siyudad sa Penonomé, nahugno ang usa ka gamay nga hotel ug ang opisina sa gobernador, samtang natumba ang usa sa mga tore sa katedral. Gikataho usab ang kadaot sa mga balay, simbahan, komersiyal nga establisemento ug mga pampublikong pasilidad.
Samtang halos tanang water treatment plants sa maong nasud ang naka-angkon og structural damage, ug ang planta nga nagsuplay og tubig sa capital, nag-operate lamang sa 20-porsiyento sa kapasidad niini.
Tungod sa linog, gipabakwit ang mga tawo gikan sa nagkalainlaing bilding isip pag-amping, samtang gipahibalo sa mga otoridad nga normal ang operasyon sa Panama canal, usa sa importanteng agi-anan sa patigayon sa kalibotan.
Gibawi na usab ang unang tsunami warning human sa linog. padayon pa ang pagsusi sa kadaot ug pagmonitor sa mga aftershocks, busa posible pang mausab ang ihap sa mga apektado samtang nagpadayon ang damage assessment.
