BUTUAN CITY – Gihukman og unom ka tuig ug tunga nga pagkabilanggo ang kanhi Australian bishop nga si Christopher Saunders human napamatud-ang sad-an sa pagpang-abuso sa duha ka batan-ong Aboriginal nga lalaki atol sa iyang pagserbisyo isip Katolikong pari.
Si Saunders, 76 anyos, kanhi Obispo sa Broome sa Western Australia, nakit-an nga sad-an niadtong Agosto sa usa ka kaso sa rape ug 12 ka kaso sa indecent assault, nga nahitabo tali sa tuig 2010 ug 2019.
Sumala sa mga rekord sa korte, sistematikong gi-groom ni Saunders ang duha ka batan-on pinaagi sa pagdapit kanila sa mga panagtapok ug paghatag og alkohol, nga gika-ingong usahay gigamit ang pondo ug mga pasilidad nga gipanag-iya sa simbahan. Sa usa sa mga kaso, napugos niya ang usa sa mga biktima sa oral sex.
Si Saunders ni-resign isip Obispo sa Broome niadtong 2020 human unang migawas ang mga alegasyon batok kaniya. Sa iyang victim impact statement, usa sa mga biktima ang nagbutyag nga lisod gihapon alang kaniya ang paghisgot sa nahitabo ug iyang gipadayag ang dakong kasakit nga iyang gidala tungod sa pagpang-abuso.
Bisan og unom ug tunga ka tuig ang iyang sentensiya, kwalipikado gihapon siya alang sa parole sa Pebrero 2031.
