BUTUAN CITY– Nabawi sa mga pwersa sa gobyerno sa Yemen ang estratehikong pantalan nga siyudad sa Mocha, lakip ang mga importanteng posisyon sa Bab al-Mandeb Strait, human maglunsad og lapad nga counteroffensive batok sa mga rebeldeng Houthi nga gisuportahan sa Iran.
Sumala sa militar sa Yemen, naglunsad usab sila og dakong opensiba padulong sa kapital nga Sanaa, diin misamot ang panagsangka ug adunay daghang namatay ug nadakpan sa bahin sa mga Houthi.
Gisuportahan ang operasyon sa air support gikan sa Saudi-led military coalition, nga giingong nagpadala og mokabat sa 100 ka fighter jets aron atakehon ang mga kagamitan ug linya sa suplay sa mga rebelde.
Nahimo ang pagbawi human misilaob pag-usab ang panagbangi sa rehiyon niadtong Septyembre, human giangkon sa mga Houthi ang Mocha ug uban pang importanteng ruta sa transportasyon sa mga kargamento.
Tungod sa bag-ong pagsaka sa tensiyon, nagpulong sa Saudi Arabia ang mga opisyal gikan sa Turkey, Pakistan ug Saudi Arabia ubos sa ilang bag-ong defense pact aron hisgutan ang sitwasyon sa Yemen ug ang posibleng mga lakang alang sa seguridad
