BUTUAN CITY- Hugot nga gilimod ni Vice President Sara Duterte ang mga pahayag ni Rodulfo Gracioso Jr. nga naglambigit kaniya sa mga insidenteng matod niini wala niya buhata, wala niya nahibaw-i sukad, o wala niya mismo nasinati.
Sa press conference nga gipahigayon sa Davao City karong adlawa, gibasa sa bise presidente ang iyang affidavit isip tubag sa mga alegasyon ni Gracioso.
Gipahayag usab niini nga pormal nga isumite sa iyang kampo ang maong affidavit karong Huwebes, Oktubre 8.
Dugang pa, giklaro sa bise presidente nga dili kini motubag o mohatag og katin-awan bahin sa mga isyung may kalabotan sa kasamtangang impeachment trial ug sa mga akusasyong gibulgar ni kanhi senador Antonio Trillanes IV.
Gihatagan og gibug-aton usab sa kampo ni Duterte, nga ang opisyal nga tubag gitumong sa pagpatin-aw sa kamatuoran taliwala sa nagkadaiyang alegasyon nga mikaylap, samtang ilang giandam ang tukmang legal nga mga lakang.
Padayon usab nga gipaabot ang pormal nga pagsumite sa affidavit sa bise presidente aron maapil kini sa opisyal nga mga rekord sa mga imbestigasyong gihimo may kalabotan sa maong isyu.
