BUTUAN CITY- Nagdeklara og dengue outbreak ang Provincial Government of Bohol human molapas sa epidemic threshold ang mga kaso sulod sa tulo ka sunod-sunod nga semana, diin base sa Executive Order No. 40 nga gipirmahan ni Gov. Aris Aumentado niadtong Agosto 25, miabot na sa 1,863 ang natala nga kaso ug 21 ang namatay gikan Enero 4 hangtod Agosto 22, 2026.
Tungod niini, gimandoan ang mga lokal nga panggamhanan nga pakusgon ang 4S Strategy, pangitaon ug laglagon ang mga lugar nga puy-anan ug breeding sites sa lamok, ug palig-onon ang dengue response lakip ang pag-establisar og Dengue Fast Lanes.
Pinakataas ang natala nga kaso sa Talibon, Tagbilaran City, Ubay, Getafe, Tubigon, Inabanga, Trinidad, Dauis, Mabini, Candijay ug Jagna, samtang Talibon, Tubigon, Getafe ug Ubay ang adunay pinakadaghang namatay.
Sigon ni Provincial Health Officer Dr. Fruserma Mary Uy, bisan hapit pareho ra ang gidaghanon sa kaso kumpara sa miaging tuig, makapabalaka ang kalit nga pagsaka sa mga kaso karong tuiga, ilabi na nga gikan sa lima ka namatay niadtong 2025, misaka kini ngadto sa 21 karon nga adunay kapin 1.17% case fatality rate, busa gipalig-on ang mga lakang aron mapugngan ang dugang pang pagtaas sa kaso ug kamatayon.
