BUTUAN CITY – Duha ka trabahante sa Frankfurt Airport sa Germany ang namatay human matakdan og malaria, atol sa talagsaong outbreak nga naka-apekto sa unom ka empleyado.
Sumala sa mga opisyal sa panglawas sa Germany, gitu-ohang ang mga lamok nga nagdala sa malaria posibleng nasakay sa usa ka eroplano ug nakaabot sa airport kansa unang namatikdan niadtong Hulyo.
Gikumpirma sa airport operator nga Fraport nga usa sa mga empleyado ang namatay tungod sa maong impeksyon apan sa kaulahian, gipahibalo sa mga opisyal sa panglawas nga duha na ka tawo ang namatay.
Nagbutang na og mga trap sa lamok sulod sa airport aron kung madakpan susihon kini sa laboratoryo aron mahibal-an ang ilang klase ug asa sila posibleng gikan.
Gipahibalo usab sa Fraport ang tanang empleyado bahin sa maong outbreak ug gi-awhag nga magpakonsulta dayon sa doktor kung makasinati og mga simtomas.
Gipadayon sa Frankfurt Public Health Department ang imbestigasyon aron mahibal-an kung giunsa pagkuyanap ang malaria sa airport.
Sumala sa mga impormasyon, ang unom ka lalaki nga trabahante nga natakdan nagtrabaho sa lain-laing posisyon ug nagkalain-laing bahin sa airport. Gisusi usab sa mga opisyal ang ilang mga blood sample aron mahibal-an kung usa ra ba ka lamok ang responsable o lain-laing lamok ang nakatakod kanila.
