BUTUAN CITY – Gipunting karon sa House prosecution panel ang susamang tubag sa mga hostile witnesses nga sila kanhi Office of the Vice President kon OVP Special Disbursing Officer Gina Acosta ug OVP Assistant Secretary Lemuel Ortonio kabahin sa paggamit sa confidential funds ni Vice President Sara Duterte.
Sigon ni House Prosecutor panel adviser ug kanhi Surigao del Norte Rep. Ace Barbers, pareho nilang gitudlo si Colonel Raymund Dante Lachica dihang gipangutana sila kung kinsa ang nagpatuman sa confidential activities.
Gibarugan ni Acosta nga iyang gihatag ang cash kang Lachica human kini gitudlo paghimo og mga confidential activities. Si Ortonio usab nagbutyag nga ang iyang nahibaw-an bahin sa mga ground operations ug ang mga tubag sa OVP ngadto sa Commission on Audit gikan usab kang Lachica.
Alang kang Barbers, mas nisamot ang kredibilidad sa testimonya ni Acosta tungod kay napaluyohan kini sa pamahayag ni Ortonio.
Gipangutana usab niya kung nganong kang Lachica gisalig ang confidential funds bisan pa nga dili siya Special Disbursing Officer ug dili usab bonded accountable officer. Sigon sa prosecution panel, aduna pa sila’y ubang mga testigo ug dokumento nga ipresentar samtang nagpadayon ang impeachment trial.
