BUTUAN CITY – Gipakusgan sa Department of Transportation (DOTr) Caraga ang kampanya sa road safety pinaagi sa hugot nga pagpatuman sa balaud nga dunay kalabutan sa transportasyon ug sa trapiko.
Opisyal nga gilusad ang bag-ong Regional Enforcement Team sa pagpanguna ni retired Col. Joel Consulta, Regional Director sa DOTr Caraga.
Pinaagi niini, maghiusa og pwersa ang Land Transportation Office kon LTO, Land Transportation, Franchising and Regulatory Board kon LTFRB, kapulisan ug City Transportation, and Traffic Management Department (CTTMD) sa pagpahigayon og unified checkpoint.
Sumala ni Director Consulta, tumong sa Unified Checkpoint ang pagpalig-on pag-usab sa pagsalig sa publiko ug pagpakita nga ang mga enforcers nagserbisyo uban sa propesyonalismo, integridad ug patas nga pagpatuman sa balaod.
Pinaagi sa hiniusang checkpoint, mas episyente nang matubag ug mahatagan og citation ang nagkalain-laing local and national traffic violations sa Butuan City ug uban pang bahin sa rehiyon.
Sigon pa, determinado ang Regional Enforcement Team nga ipakita sa katawhan nga seryoso ang mga ahensya sa gobyerno sa pagpauswag sa serbisyo, pagpalig-on sa disiplina sa kadalanan, ug pagpanalipod sa kaluwasan sa tanang motorista ug pasahero sa tibuok Caraga Region.
