BUTUAN CITY – Gibaslan sa Chinese Embassy sa Pilipinas ang pamahayag ni Department of National Defense (DND) Secretary Gilberto Teodoro Jr. kalabot sa pagdakop sa mga Chinese workers sa usa ka steel plant sa Tagoloan, Misamis Oriental.
Matud sa Chinese Embassy, wala’y lig-ong basihan ang mga pamahayag ni Teodoro, dayong butyag nga gituis niini ang kamatuoran.
Madumdoman nga 69 ka mga Chinese workers ang gidakop atol sa pag-raid sa Philippine Sanjia-Steel Corp. sa Misamis Oriental niadtong Mayo nga gilusad sa Armed Forces of the Philippines (AFP), Presidential Anti-Organized Crime Commission (PAOCC), National Bureau of Investigation (NBI) ug uban pang law enforcement agencies.
Kagahapon, gipadayag ni Teodoro ang iyang posisyon nga ilegal ang mga kalihokan sa mga Chinese nationals nga nadakpan sa planta. Lakip niini ang pagproseso pag-usab sa substandard ug giingong radioactive-contaminated nga asero, paglabay og wala matratar nga hugaw nga tubig ngadto sa mga suba, ug pagpagawas og makahilong aso nga wala matratar.
Apan gikuwestiyon sa Chinese Embassy ang pag-apil sa AFP sa maong operasyon ilabina ang pagdakop sa mga Chinese workers inay nga ang mga tawo nga responsable sa pagdumala sa planta samtang ang gipangsikop nga mga Filipino workers gibuhian dayon.
Gikuwestiyon usab niini nganong gidala pa sa Manila ang mga Chinese worker aron didto detainon gamit ang military aircraft.
Una nang gibatikos ni Teodoro ang aksyon sa China batok sa kapin 100 ka Pilipino nga gika-ingong ilegal nga nagtrabaho o nagpuyo sa China. Apan matud sa Chinese Foreign Ministry spokesperson nga si Guo Jiakun, ang mga langyaw nga anaa sa ilang nasud, kinahanglan mosunod sa ilang mga balaod ug regulasyon.
