BUTUAN CITY – Gipahimangnoan sa Department of Labor and Employment o DOLE ang mga employers kabahin sa hustong pagbayad sa sweldo sa mga empleyado alang sa duha ka holidays karong bulan sa Agosto.
Apil niini ang Agosto 21 nga gideklara ni Pangulong Ferdinand Marcos Jr. nga special non-working day kansa mao ang Ninoy Aquino Day isip paghinumdom sa anibersaryo sa pagkamatay ni kanhi Senador Benigno “Ninoy” Aquino Jr.
Matud sa DOLE, ipatuman niini nga adlaw ang “no work, no pay” policy apan ang empleyadong mosulod sa trabaho niining adlawa, makadawat og dugang 30 porsyento sa iyang basic wage alang sa unang walo ka oras nga trabaho. Kung molapas sa walo ka oras, adunay dugang 30 porsyento sa matag-oras nga overtime.
Kung ang Agosto 21 matunong sa rest day sa empleyado ug patrabahuon siya, makadawat siya og 150 porsyento sa iyang basic wage alang sa unang walo ka oras, ug dugang 30 porsyento sa matag oras kung molapas sa walo ka oras ang trabaho.
Samtang ang Agosto 31 nga mao ang National Heroes’ Day, usa ka regular holiday rason nga ang empleyadong dili mosulod sa trabaho nianang adlawa makadawat gihapon sa iyang 100 porsyentong sweldo, basta kwalipikado siya ubos sa mga lagda sa DOLE.
Kung mosulod sa trabaho ang empleyado, makadawat siya og 200 porsyento sa iyang basic wage alang sa unang walo ka oras. Kung molapas sa walo ka oras, adunay dugang 30 porsyento sa iyang hourly rate alang sa overtime.
