BUTUAN CITY – Kasagarang girekomenda ang pagdugang sa pagkaon og protina, ilabina sa pipila ka grupo sa mga tawo.
Apan migawas sa usa ka bag-ong pagtuon nga ang pagkunhod sa pagkaon og protina, makatabang sa paglugway sa kinabuhi ug maghatag og daghang benepisyo sa panglawas pinaagi sa pagpaayo sa metabolismo ug pagpakunhod sa kadaot sa mga selyula.
Apan sumala sa pagtuon, dili lang basta ang pagkunhod sa kinatibuk-ang protina ang importante, kondili ang pagminus sa pipila ka amino acids sama sa isoleucine ug methionine, nga posibleng makatabang sa himsog nga pagkatigulang.
Usa ka bag-ong review, gisugyot nga ang paglimit sa kinatibuk-ang protina sa pagkaon o sa pipila ka essential amino acids, makatabang sa pagpaayo sa kalidad sa panglawas samtang nagkatigulang ug sa paglugway sa kinabuhi, susama sa mga benepisyo nga nakita sa paglimit sa kaloriya.
Gisusi sa maong review ang kapin 350 ka mga siyentipikong pagtuon nga naglakip sa mga eksperimento sa mga hayop ug tawo. Gitan-aw niini ang epekto sa pagkunhod sa protina sa lain-laing organismo, lakip ang mga mikrobyo, ilaga, uban pang hayop, ug mga tawo.
Sumala sa mga tigdukiduki, ang pagkaon og mas gamay nga protina adunay daghang posibleng benepisyo sa panglawas.
Makatabang kini sa lawas nga mas makasunog og kaloriya, makapakunhod sa tambok sa lawas, ug mas maayo nga makakontrol sa lebel sa insulin pinaagi sa pagtaas sa Fibroblast Growth Factor 21 o FGF21, usa ka hormone nga adunay papel sa pagpanalipod sa lawas batok sa mga epekto sa pagkatigulang.
