BUTUAN CITY- Gipamatud-an pag-usab sa World Health Organization (WHO) nga walay siyentipikong ebidensiya nga nagkonektar sa mga bakuna ngadto sa autism, base sa bag-ong pag-susi sa 31 ka pagtuon gikan sa nagkalain-laing nasod sulod sa 15 ka tuig.
Sigon ni WHO Director-General Tedros Adhanom Ghebreyesus, lakip sa gisusi ang mga bakunang adunay thimerosal ug aluminum, ug nakaplagan nga walay causal link tali niini ug autism.
Kini na ang ikaupat nga review sa WHO sukad 2002, ug pareho ang konklusyon nga dili hinungdan sa autism ang mga bakuna. Ang kontrobersiya naggikan sa usa ka 1998 nga pagtuon kansa nag-angkon og koneksyon tali sa MMR vaccine ug autism, apan gibawi kini human napamatud-ang adunay peke o sayop nga datos.
Samtang ang mga kausaban sa website sa US Centers for Disease Control and Prevention o CDC nakapukaw og kabalaka sa mga eksperto sa panglawas, gipasiugda sa WHO nga ang mga bakuna mahimong adunay ubang side effects apan dili apil ang autism.
Dugang pa ni Tedros nga dakong papel ang pagbakuna sa pagkunhod sa pagkamatay sa mga batang ubos lima ka tuig, ug nag-ingon nga ang mga bakuna nakaluwas og milyones ka kinabuhi batok sa mga sakit sama sa measles, cervical cancer ug malaria.
