BUTUAN CITY – Nagkaduol na ang England nga mahimong usa sa mga unang nasod sa tibuok kalibotan nga hingpit nga makawagtang sa hepatitis C, usa ka delikado nga virus nga moatake sa atay, sumala sa mga datus.
Ang target nga matambalan ang 80% sa tanang nasuta nga kaso nakab-ot na, ug ang mga namatay tungod sa virus mikunhod og 36% sa miaging dekada, dyutay nalang ang kulang sa gikinahanglan nga target para sa tuig 2030.
Ang pag-inom og mga antiviral nga tabletas sulod sa 8 ngadto sa 12 ka semana makapaayo sa kapin 95% sa mga kaso.
Lakip sa mga inisyatiba niini ang mga blood test sa Emergency Room, GP registration testing, ug libre nga mga pagsusi o test diha sa balay nga nakatabang sa pagpangita sa mga tawo nga wala pa madiagnose.
Ang hepatitis C mapasa pinaagi sa paghikap o pagkahisagol sa dugo nga natakdan sa virus, sama sa dungan nga paggamit og dagom sa laing tawo nga duna niini.
Ang dugo gikan sa mga donor gisusi nang daan.
Gitawag kini nga silent disease o hilom nga sakit tungod kay ang mga tawo kasagaran walay mabati nga simtomas hangtod sa ulahing bahin.
Kon dili matambalan, mahimo kini nga hinungdan sa seryoso ug posibleng makamatay nga pagkadaot sa atay.
