BUTUAN CITY- Giinsistar ni Senador Panfilo “Ping” Lacson nga kinahanglan og mas lawom nga pagsusi ang Commission on Audit (COA) sa paggamit sa confidential funds, lakip ang aktuwal nga pag-inspeksyon sa vault diin gitipigan ang classified information ug pagberipika sa tinuod nga identidad sa mga tawo nga migamit og aliases sa mga dokumento.
Sumala ni Lacson, gitakda sa Joint Memorandum Circular No. 2015-01 ang mga pamaagi sa pag-inspeksyon sa maong mga vault, lakip ang pag-verify sa mga alias nga makita sa acknowledgment receipts, sama sa “Mary Grace Piattos,” “Patty Ting” ug “Andy Lim.” Gikwestyon usab niini kung giunsa sa COA pag-verify ang mga transaksiyon sa confidential funds kung wala niini aktuwal nga na-inspeksyon ang vault ug nagsalig lamang sa paper audit.
Gikutlo usab sa senador ang COA Circular No. 2020-005, kansa naglatid sa proseso alang sa fraud audit investigation kung adunay impormasyon nga posibleng adunay nahitabo nga pagpanikas o fraud nga mahimong mosangpot sa criminal case. Tungod niini, gipangutana ni Lacson kung nganong wala magpahigayon ang COA og fraud audit investigation bisan pa sa mga isyung mitumaw sa pag-audit sa confidential funds.
Sa miaging impeachment trial, gisugyot usab niini ang pag-amendar sa Joint Memorandum sa COA tungod sa iyang pagtan-aw nga kulang ang mga detalye niini bahin sa aktuwal nga paggamit sa confidential funds. Samtang, nagdumili si Lacson sa pagkomento sa giingong pagkiling sa pipila ka senator-judge sa impeachment trial, ug dayong butyag nga isip miyembro sa Impeachment Court, dili niini gustong hukman ang mga aksyon o baruganan sa iyang mga kaubanan.
